Verkstjórasamband Íslands

Umsækjendum um atvinnuleysistryggingar er bent á að snúa sér til næstu þjónustuskrifstofu Vinnumálastofnunar til að leggja inn umsókn, skrá sig í vinnumiðlun og fá ráðgjöf um starfsleit.

Atvinnuleysistryggingasjóður sinnir fjölbreyttum verkefnum og er hægt að kynna sér þau á forsíðu Vinnumálastofnunar.

 Frekari upplýsingar um þjónustu Greiðslustofu og umsóknir um atvinnuleysistryggingar fást með því að smella hér.

Rafræn umsókn um atvinnuleysisbætur

 

Nú lifum við erfiða óvissutíma. Við heyrum það hjá félagsmönnum okkar að fyrirtækin berjast mörg fyrir afkomu sinni og tilveru. Nokkuð er um það að fyrirtæki vilja gera þá öryggisráðstöfun að segja upp fólki sem það þó vill alls ekki missa. Sumir hafa velt fyrir sér hvort að hægt sé með sameiginlegu samkomulagi hægt að stytta uppsagnartímann t.d. niður í einn mánuð. Þeir hafa þá hugsað það þannig að ef til vill muni þeir hafa næstu mánuði af og sjá fram á bjartari daga um áramótin en ef það líti ekki þannig út þá geti þeir sagt upp fólki um áramótin með mánaðar fresti. Þetta er ekki hægt. Það er ekki hægt að semja um lakari niðurstöðu en kjarasamningurinn segir til um. Menn geta þá rift slíkum samningi og þá þarf löglega uppsögn með fullum fresti, ef slíkt stendur til. Hér að ofan í spurningum og svörum er kaflinn um uppsagnir úr almenna kjarasamningnum. Vonandi reynist mögulegt, með sameiginlegu átaki, að koma í veg fyrir atvinnuleysi og þá ömurlegu stöðu sem það kemur fólki í. Við hvetjum ráðandi menn í fyrirtækjum til að leita allra leiða til að komast hjá slíku.

Þann 6. október sl. voru samþykkt á Alþingi lög 125/2008 um heimild til fjárveitingar úr ríkissjóði vegna sérstakra aðstæðna á fjármálamarkaði o.fl. Fela þessi lög það í sér m.a að við sérstakar og mjög óvenjulegar aðstæður á fjármálamarkaði er fjármálaráðherra fyrir hönd ríkissjóðs heimilt að reiða fram fjármagn til að stofna nýtt fjármálafyrirtæki eða yfirtaka fjármálafyrirtæki eða þrotabú þess í heild eða að hluta. Þessum heimildum hefur þegar verið beitt eins og alþjóð veit. Ekki er hægt að veita tæmandi upplýsingar um hvað lögin fela í sér og verður tíminn einn að leiða það í ljós. Það eru hins vegar nokkur atriði sem eru skýr eins og komið hefur fram í fjölmiðlum:

Lesa nánar: Neyðarlög - samantekt

Nú liggja niðurstöður kjarakönnunarinnar fyrir. Könnunin var gerð í febrúar til mars á þessu ári. Miðað er við launaupplýsingar fyrir febrúar. Einnig var aðeins horft til heildar launa fyrir árið 2007 í ákveðinni spurningu. Það er margt fróðlegt að sjá í þessum niðurstöðum, þó að etv. megi segja að fátt komi alveg á óvart.

Lesa nánar: Kjarakönnun innan Verkstjórasambandsins

Verkstjórar og aðrir stjórendur í okkar félagsskap hafa miklar áhyggjur af því hvernig efnahagsmálin hafa þróast. Það er ljóst að kjarasamningar á almennum vinnumarkaði munu ekki halda. Fyrirtækin eiga flest einnig nokkuð erfiða daga. Við leggjum til að ekki verði beðið fram á síðustu stund með að finna leiðir og lausnir sem brúa bilið þannig að samningar geti haldið.Verkstjórasambandið hvetur aðila til að finna sameiginlega leið til lausnar, án átaka. Lausn sem allir geti sæmilega sætt sig við.Það er þó ljóst að ef ekki verður fljótlega hægt að hemja verðbólguna þá verða fáar góðar lausnir í boði. 

Við lok Alþingis í apríl 2009 voru samþykkt mjög mikilvæg lög fyrir þá sem orðið hafa fyrir líkamstjóni í slysi.  Skaðabótalögum nr. 50/1993 var breytt þannig að ekki er lengur heimilt að draga ýmsar bætur frá tjónabótum. Verkstjórasambandið hefur lengi talað fyrir þessum breytingum og beint hvatningu þar að lútandi til þingmanna. Það þó ekki víst að öllum þyki nægilega langt gengið, en vissulega er þetta mikil framför.

Greinin hljóðaði svona:

Varanleg örorka. 5. gr. [Valdi líkamstjón, þegar heilsufar tjónþola er orðið stöðugt, varanlegri skerðingu á getu til að afla vinnutekna á tjónþoli rétt á bótum fyrir varanlega örorku.]1)

Þegar tjón vegna örorku er metið skal líta til þeirra kosta sem tjónþoli á til að afla sér tekna með vinnu sem sanngjarnt er að ætlast til að hann starfi við.

Örorka tjónþola reiknast í hundraðshlutum (örorkustigum).

[Frá skaðabótakröfu vegna líkamstjóns dragast greiðslur sem tjónþoli fær frá almannatryggingum, bætur frá slysatryggingu ökumanns eftir umferðarlögum og bætur frá sams konar slysatryggingu manns er slasast sem farþegi í eigin ökutæki. Greiðslur frá samnings- eða lögbundinni atvinnuslysatryggingu launþega dragast frá skaðabótakröfu hans á hendur vinnuveitanda þeim sem slysatrygginguna keypti. [Bætur samkvæmt lögum um sjúklingatryggingu skal einnig draga frá skaðabótakröfu.]2) Jafnframt skal draga frá skaðabótakröfu 40% af reiknuðu eingreiðsluverðmæti örorkulífeyris frá lífeyrissjóði og skal við útreikninginn miðað við 4,5% ársafvöxtun. Aðrar greiðslur sem tjónþoli fær frá þriðja manni vegna líkamstjóns, svo sem lífeyrissjóði eða vátryggingafélagi, dragast ekki frá skaðabótakröfu

Breytingin er:

1. gr.  Í stað orðanna „greiðslur sem tjónþoli fær frá almannatryggingum“ í 4. mgr. 5. gr. laganna kemur: eingreiddar örorkubætur almannatrygginga, sbr. 5. mgr. 34. gr. laga nr. 100/2007. 

Einnig var 13. gr. skaðabótalaganna breytt en hún hljóðar þannig fyrir breytingu:

Bætur til maka eða sambúðarmaka. 13. gr. Bætur fyrir missi framfæranda til maka eða sambúðarmaka skulu vera 30% af bótum þeim sem ætla má að hinn látni mundi hafa átt rétt á fyrir algera (100%) örorku, sbr. 5.–8. gr. Bætur skulu þó nema ekki minni fjárhæð en 3.000.000 kr. nema sérstaklega standi á.

Breytingin er:

2. gr. Við 1. málsl. 1. mgr. 13. gr. laganna bætist: án frádráttar.

Eitthvað hefur það þvælst fyrir sumum launagreiðendum hvernig á að gera skil á framlagi vinnuveitenda í endurhæfingarsjóðinn (0,13%) en þessu framlagi á að skila í lífeyrissjóð viðkomandi einstaklings. Það er sem sagt skýrt að lífeyrissjóðirnir eiga að taka við greiðslunum fyrir sjóðfélaga sína og gera þeir síðan skil á þeim áfram til endurhæfingarsjóðsins. Hugbúnaðarfyrirtækin sem smíðað hafa bókhaldsforritin hafa flest nú þegar gert viðeigandi breytingar. Sjá bréf um endurhæfingargjaldið. Skil vegna framlags í STARFSMENNTASJÓÐ VERKSTJÓRA (0,30%) á að gera á sömu skilagreinar og þegar skil geru gerð  fyrir félagsgjöld, sjúkrasjóðsgjöld og orlofssjóð. Á venjulegar skilagreinar bætist sem sagt starfsmenntasjóðurinn við önnur skil. Ekki þarf að gera breytingu á bókhaldsforritum vegna þessa nýja starfsmenntasjóð, aðeins setja hann inn í forritið eins og aðra menntunarsjóði. Allir vinnuveitendur félagsmanna okkar á almennum vinnumarkaði munu nú greiða í þennan sjóð og þau fyrirtæki sem áður greiddu í menntunarsjóðinn munu eftirleiðis greiða í þennan nýja starfsmenntasjóð (menntunarsjóð).

Hátt olíuverð, gengisfellingar og almenn dýrtíð tekur sannalega í og skilar sér í mikilli verðbólgu.  Samkvæmt meðfylgjandi töflu sem fengin er frá Seðlabankanum (http://www.sedlabanki.is ) hefur vísitala neysluverðs síðustu 12 mánað skilað gildi sem sýnir 12,7% hækkun verðlags.Afleiðingin fyrir almennt launafólk er veruleg kjaraskerðing og ef fólk skuldar eitthvað að ráði þá hefur hækkun vaxta einnig tekið sinn skerf.Þessi staða hefur einnig komið mjög illa við fyrirtækin, sérstaklega þau sem ekki eru í útflutningi. Það blasir við að forsendur kjarasamninga munu ekki halda, þannig að þeir koma til endurskoðunar í febrúar n.k. Fólk hefur þá orðið fyrir verulegri kjaraskerðingu sem það mun þurfa að fá bætta. Nú biðjum við þess, hátt og í hljóði að vel takist til við hagstjórnina. Farið verði í fyrirhugaðar framkvæmdir og séð til þess að ekki komi til atvinnuleysis. Rekstrarumhverfið verði tryggt, þannig að fyrirtækin hafi getu til að mæta væntanlegum launaleiðréttingum.

Miðvikudaginn 2. júlí var skrifað undir nýjan kjarasamning við Orkuveituna. Samningurinn er í samræmi við aðra samninga sem gerðir hafa verið síðustu vikur. Samningurinn var kynntur og samþykktur með miklum meirihluta á fundi 3. júlí. Einn sat hjá og engin greiddi atkvæði á móti. Hér er samningurinn

Samþykkt hefur verið stofnun sérstaks sjóðs sem heitir STARFSMENNTASJÓÐUR VSSÍ OG SA. Samþykkt þessi er í samræmi við ákvörðum sem fylgdi samningi aðila sem gildi tók í febrúar s.l. og verður hluti þess kjarasamnings. Vinnuveitendur á almennum markaði munu frá og með 1. júlí 2008 greiða 0,3% af öllum launum manna í starfsmenntasjóðinn. Framlögum vinnuveitenda í menntunarsjóðinn skal skila með öðrum greiðslum til Verkstjórafélaga eða Verkstjórasambandsins á viðeigandi skilagreinum vegna félagsmanna okkar. Viðauki við kjarasamning um starfsmenntasjóð. Samþykkt starfsmenntasjóðs og vinnureglur.